Ораш дар Душанбе
Овозхони машҳури эронитабори Шветсия Ораш, ки бо таронаҳои «Боро-боро», «Фариштаи шикаста» (Broken Angel) ва «Ишқи пок» (Pure Love) дар саросари ҷаҳон шуҳрат пайдо кардааст, ба шаҳри Душанбе омад. Ӯ яке аз меҳмонони чорабинии бошукӯҳи «Шоми пирӯзиҳои бузург» буд, ки бо ташаббуси ширкати TAS International Group баргузор гардид.
Меҳмони Душанбе
Дар бораи сафари овозхон ширкати TAS International Group дар саҳифаи расмии худ дар шабакаи иҷтимоии Instagram хабар додааст.
Ораш дар қатори чеҳраҳои маъруфи ҷаҳонӣ, аз ҷумла муштзанони афсонавӣ Майк Тайсон ва Эвандер Ҳолифилд, ҳунармандони шинохта Леонид Якубович, Дмитрий Нагиев, Стивен Сигал, Тина Канделакӣ, ҳамчунин овозхонон Юлдуз Усмонова ва ANNA ASTI ба Душанбе ташриф овард.
Чорабинии «Шоми пирӯзиҳои бузург» 5-уми ноябри соли 2026 дар Қасри теннис ва маҷмааи варзишҳои обии шаҳри Душанбе баргузор шуда, намояндагони варзиш, синамо ва мусиқии кишварҳои гуногунро гирди ҳам овард.
Ораш кист ва чӣ гуна машҳур шуд?
Номи аслии овозхон Ораш Лабаф аст. Ӯ 23 апрели соли 1977 дар шаҳри Теҳрони Эрон ба дунё омада, дар кӯдакӣ ҳамроҳи хонаводааш ба Шветсия кӯч бастааст.
Бо вуҷуди он ки қисми зиёди ҳаёташ дар Аврупо гузаштааст, Ораш забони форсиро дар эҷодиёташ ҳифз намуда, бо омезиши мусиқии эронӣ ва сабкҳои муосири попу рақсии аврупоӣ шуҳрати байналмилалӣ пайдо кард.
Соли 2004 таронаи «Боро-боро» номи ӯро ба мухлисони мусиқии кишварҳои гуногун муаррифӣ намуд. Ин суруд дар ҷадвалҳои мусиқии Шветсия мақоми аввалро касб карда, баъдан дар дигар кишварҳои Аврупо низ маҳбуб шуд.
Соли 2005 нахустин албоми ӯ бо номи «Arash» ба бозор баромад. Таронаҳои «Temptation» ва «Tike Tike Kardi» низ муваффақияти зиёд ба даст оварданд.
Баъдан албомҳои «Donya» (2008) ва «Superman» (2014) нашр шуданд, ки мавқеи овозхонро дар саҳнаи байналмилалӣ мустаҳкам карданд.
Аз «Евровидение» то ҳамкорӣ бо ситораҳои ҷаҳон
Яке аз рӯйдодҳои муҳими фаъолияти ҳунарии Ораш иштироки ӯ дар озмуни байналмилалии «Евровидение» дар соли 2009 мебошад.
Ӯ ҳамроҳи овозхони озарбойҷонӣ Ойсел Темурзода бо таронаи «Always» аз Ҷумҳурии Озарбойҷон намояндагӣ карда, дар ин озмун мақоми сеюмро соҳиб шуд.
Ораш дар фаъолияти эҷодии худ бо чандин ҳунарманди маъруфи ҷаҳон ҳамкорӣ кардааст. Аз ҷумла, таронаҳои муштараки ӯ бо Ҳелена, Шон Пол, T-Pain ва Snoop Dogg дар кишварҳои гуногун шунавандагони зиёд пайдо кардаанд.
Таронаи «Broken Angel», ки соли 2010 бо ҳамовозии Ҳелена нашр шуд, аз маъруфтарин сурудҳои ин ҳунарманд ба шумор меравад.
Ораш ва мухлисони тоҷик
Ҳарчанд Ораш дар Аврупо зиндагӣ ва фаъолият мекунад, сурудҳои форсии ӯ дар Тоҷикистон низ шунавандагони худро доранд. Таронаҳои «Боро-боро», «Ишқи пок», «Дунё» ва «Фариштаи шикаста» барои дӯстдорони мусиқии эстрадӣ ошноянд.
Ҳунари Ораш аз он ҷиҳат ҷолиб аст, ки тавонистааст мусиқии форсизабонро ба саҳнаҳои байналмилалӣ барорад ва ба шунавандагоне муаррифӣ намояд, ки забони форсиро намедонанд.
Сафари ин овозхони маъруф ба Душанбе дар доираи чорабинии TAS International Group бори дигар таваҷҷуҳи мухлисони тоҷикро ба ҳунари ӯ ҷалб кард.
Сипеҳр
