Девори вайрон нишони хонавайронӣ аст?
Шаби гузашта хоби аҷибе дидам. Дар хоб ба хонаи яке аз дӯстонам меҳмонӣ рафтам. Манзилаш хеле зебою пурҷиҳоз буд, вале як девори хона вайрон шуда буд. Ман девори вайронаро ба дӯстам нишон дода, таъкид мекардам, ки онро ҳарчи зудтар таъмир кунад, зеро бисёр хатарнок аст ва мумкин аст тамоми хона фурӯ резад. Аслан, хобҳои дидаам дар ёдам намемонанд, вале намедонам чаро ҳамин хоб сахт дар хотирам нақш бастааст. Аз ҳамон рӯз ин манзара аз пеши назарам дур намешавад. Мехоҳам бидонам, ки дидани хонаи зебо бо девори вайрон чӣ таъбир дорад? Оё ин хоб ба ман дахл дорад ё ба дӯстам?
Нигора, муштарии «Оила»
Посух:
Дар хобномаҳои мардумӣ дидани хонаи вайрона бештар рамзи мушкилот, нооромӣ ва дигаргуниҳои зиндагӣ дониста мешавад. Аммо таъбири чунин хоб ба ҳолати хона, шахси хобдида ва воқеаҳои дар хоб рухдода вобаста аст.
Агар кас хоб бинад, ки манзили зебою ободе як девори вайрон дорад, ин метавонад рамзи он бошад, ки дар паси зиндагии зоҳиран орому осуда мушкиле нуҳуфтааст. Девори хона дар таъбирҳои анъанавӣ нишонаи ҳимоя, устуворӣ ва амнияти оила мебошад. Вайрон шудани он метавонад ба пайдоиши нофаҳмӣ миёни наздикон, мушкилоти молиявӣ ё суст шудани муносибатҳои хонаводагӣ ишора кунад.
Азбаски шумо дар хоб девори вайронаро ба дӯстатон нишон дода, ӯро ба таъмири он даъват мекардед, чунин манзараро метавон рамзи ғамхорӣ ва эҳсоси масъулият нисбат ба наздикон донист. Шояд дар зиндагии воқеӣ низ мехоҳед дӯстатонро аз хатое боздоред ё дар ҳалли мушкиле ёрӣ расонед.
Дар баъзе хобномаҳо таъмир кардани девори вайрон нишонаи оштӣ, ислоҳи хатоҳо ва барқарор шудани муносибатҳои сардшуда маънидод мешавад. Агар хона қисман вайрон бошад, инро рамзи мушкили гузаранда медонанд, ки бо ақлу тадбир ҳал шуданаш мумкин аст.
Ба ҳар ҳол, чунин таъбирҳо пешгӯии қатъии оянда нестанд. Хоб метавонад бозтоби андешаҳо, ташвишҳо ва эҳсосоти рӯзмарраи инсон бошад. Бинобар ин, аз хоби дидаатон наҳаросед. Агар аз ҳоли дӯстатон хабар гиред, кори хубе мекунед.