Утеря
Фарзандро озод гузорем ё тарбия кунем?
22.11.2026
Оила
147

Фарзандро озод гузорем ё тарбия кунем?
 
Салом, кормандони азизи рӯзномаи «Оила» ва хонандагони гиромӣ!
Имрӯз мехоҳам масъалаеро ба миён гузорам, ки ба андешаи ман, барои ҳар як падару модар муҳим аст. Оё кӯдакро бояд аз хурдӣ ба тартибу интизом одат кунонд ё барояш озодии комил дод, то ҳар коре мехоҳад, анҷом диҳад?
Чанде пеш дугонаам бо писарчааш ба меҳмонии мо омад. Ростӣ, рафтори кӯдак маро дар ҳайрат гузошт. Ӯ бе иҷозат ба ҳар чиз даст мерасонд, ашёи хонаро гирифта, ба ҳар тараф мепартофт, ба гапи калонсолон гӯш намедод. Ҳатто вақте бо нармӣ аз ӯ хоҳиш кардам, ки ба баъзе чизҳо даст нарасонад, парвое накард.
Аз ҳама аҷибаш муносибати дугонаам буд. Вай гӯё чизеро намедид. На писарашро насиҳат мекард, на рафторашро ислоҳ менамуд. Вақте аз ӯ пурсидам, ки чаро ба фарзандаш эрод намегирад, бо ханда гуфт:
- Бача аст, чӣ кор мекунӣ? Калон шавад, худаш мефаҳмад!
Ин сухан маро сахт ба андеша бурд. Магар тарбияро то калон шудани фарзанд ба таъхир гузоштан мумкин аст? Агар кӯдак имрӯз эҳтироми калонсолон, риояи тартиб ва фарқи хубу бадро наомӯзад, фардо чӣ гуна инсоне мешавад?
Албатта, ман тарафдори он нестам, ки кӯдакро бо доду фарёд, тарсонидан ё ҷазои ҷисмонӣ тарбия кунем. Кӯдак бояд озодона бозӣ кунад, андешаашро баён намояд ва аз айёми ширини кӯдакӣ лаззат барад. Аммо озодӣ ҳам бояд ҳадду ҳудуд дошта бошад.
Баъзе волидон мегӯянд, ки онҳоро падару модарашон сахтгирона тарбия кардаанд ва онҳо низ ҳамин роҳро интихоб мекунанд. Гурӯҳи дигар баръакс, ба фарзандонашон ҳеҷ чизро манъ намекунанд. Ба фикрам, ҳар ду ифрот аст.
Мехоҳам аз модарони рӯзгордида ва мутахассисони тарбияи кӯдак бипурсам: Оё маҳдудият барои кӯдак зарур аст? Чӣ гуна метавон меҳрубониро бо талабчангию интизом пайваст кард?
Андешаҳои шуморо интизорам, зеро тарбияи фарзанд танҳо масъалаи як оила нест, балки масъалаи ояндаи ҷомеаи мост.
Бо эҳтиром, Парвина

Поделиться новостью
Шарҳ
(0)
ҲАНУЗ ШАРҲ НЕСТ
НОМАТОНРО НАВИСЕД
ШАРҲАТОНРО ГУЗОРЕД
Шарҳ
(0)
ҲАНУЗ ШАРҲ НЕСТ
НОМАТОНРО НАВИСЕД
ШАРҲАТОНРО ГУЗОРЕД