Дар Тоҷикистон масъалаи ҷорӣ кардани низоми бе раводид бо Ҷумҳурии Мардумии Чин дар ҳоли баррасӣ қарор дорад. Дар ин бора роҳбарияти Кумитаи рушди сайёҳӣ дар нишасти матбуотӣ иттилоъ дода, таъкид намуд, ки соли ҷорӣ ин мавзуъ дар сатҳи дахлдор баррасӣ мешавад ва умед ҳаст, ки ба натиҷаи мусбат мерасад.

Мақомоти соҳа мегӯянд, ки дар баробари кишварҳои Амороти Муттаҳидаи Араб, Англия, Олмон, Фаронса, Русия ва Кореяи Ҷанубӣ, Чин низ ба гурӯҳи бозорҳои асосии сайёҳӣ барои Тоҷикистон дохил мешавад. Ҷорӣ кардани низоми бе раводид метавонад сафар ба кишварро барои шаҳрвандони Чин осонтар карда, шумораи меҳмонони хориҷиро афзоиш диҳад.

Дар солҳои охир Тоҷикистон сиёсати соддагардонии низоми раводидро фаъолона пеш мебарад ва бо як қатор кишварҳо тартиби бе раводид ё раводиди сабукшударо ҷорӣ кардааст.

Гуфта мешавад, ки дар сурати амалӣ шудани низоми бе раводид бо Чин, на танҳо соҳаи сайёҳӣ, балки бахшҳои марбут ба нақлиёт, меҳмонхонаҳо ва хизматрасонӣ низ рушд хоҳанд кард. Ҳоло ҷузъиёти дақиқи ин ташаббус эълон нашудааст, аммо баррасии он ҳамчун қадами муҳим дар самти густариши ҳамкориҳои Тоҷикистону Чин арзёбӣ мегардад.