Вазорати корҳои дохилии Тоҷикистон се блогери тоҷик - Ибронов Раҷабалӣ, Ғаниева Миҷгона ва Раҳмонзода Далерро барои омода ва паҳн кардани наворҳои таҳқиромез дар шабакаҳои иҷтимоӣ боздошт кардааст.
Тибқи иттилои мақомоти корҳои дохилӣ, дар наворҳои паҳншуда шахсони нобино масхара шуда, шаъну шарафи онҳо паст зада шудааст. Гуфта мешавад, ки пас аз шикояти як гурӯҳи шаҳрвандон нисбат ба блогерон чораҳои ҳуқуқӣ андешида шудаанд. Бо қарори суд Ибронов Раҷабалӣ ва Раҳмонзода Далер ба ҳабси маъмурӣ маҳкум шуда, Ғаниева Миҷгона ба пардохти ҷарима уҳдадор шудааст.
Мақомоти Тоҷикистон таъкид мекунанд, ки омода ва паҳн кардани маводи таҳқиромез, ки шаъну шарафи шаҳрвандонро паст мезанад, метавонад боиси ҷавобгарии қонунӣ гардад.
