Полиси шаҳри Душанбе як сокини пойтахтро бо гумони ташкили фасодхона дастгир кардааст.
Бино ба иттилои Раёсати ВКД дар шаҳри Душанбе, М. Р.-и 24-сола дар манзили иҷоравии худ дар ноҳияи Сино барои истеъмоли воситаҳои нашъадор шароит фароҳам овардааст. Тибқи маълумоти тафтишот, дар ин манзил шаҳрвандоне ҷамъ меомадаанд, ки ба истеъмоли маводҳои нашъадор майл доранд.
Зимни гузаронидани амалиёти оперативӣ кормандони полис якчанд нафарро ҳангоми истеъмоли воситаҳои нашъадори навъи «метамфетамин» дастгир намудаанд. Аз ҷумла, шаҳрвандон Бобоев Ш., Насриддинова М., Давлатова Ф. ва Одинаев М. дар ҳолати истифодаи маводи нашъадор боздошт шудаанд.
Ҳангоми кофтукови манзили истиқоматии гумонбар асбобу таҷҳизоте, ки барои истеъмоли воситаҳои нашъадор истифода мешаванд, ҳамчун далели шайъӣ дарёфт ва мусодира гардидаанд.
Айни ҳол ҳамаи дастгиршудагон дар ҳабси пешакӣ қарор дошта, вобаста ба ин ҳодиса тафтишоти пешакӣ идома дорад.
