Фасли тирамоҳ қариб ба интиҳо расида, ба саршавии зимистон рӯзҳои башумор боқӣ мондааст. Бо сабаби тағйирёбии вазъи боду ҳаво ва пастшавии ҳарорат шахсоне, ки ба мигрен гирифторанд, дар ин айём бештар аз дарди сар азият мекашанд. Нишонаҳои асосии ин беморӣ дилбеҳузурӣ, ҳассосият ба рӯшноию садо ва дарди ҷонкоҳи сар аст. Имрӯз мо ба шумо дар бораи роҳҳои пешгирии ин беморӣ ва паст кардани шиддати дардҳои мигрении сар маълумот медиҳем.
Чаро мигрен дар фаслҳои тирамоҳ ва зимистон бештар авҷ мегирад?
Мигрен як намуди дарди сар мебошад, ки дар натиҷаи тағирёбии ҳарорат, фишори атмосферӣ ва гармии хона дар моҳҳои нисбатан сардтари сол бештар авҷ мегирад. Стресс ва асабонияти зиёд низ метавонад боиси шиддат гирифтани сардарди мигренӣ бигардад. Омили дигари беморӣ коҳиши таъсири нурҳои офтоб ба сатҳи серотонин аст.
Сабабҳои асосии мигрен инҳоянд:
Ҳавои хунук
Якбора паст шудани ҳарорати ҳаво боиси тангшавии рагҳои хун гашта, дар натиҷа хун дар майнаи сар хуб гардиш намекунад ва албатта ин метавонад боиси ташаннуҷ ва мигрен гардад.
Камфаъолиятӣ
Аксари одамон дар мавсими сармо танбал шуда, хеле кам ба кӯча мебароянд. Камфаъолиятӣ боиси хуруҷи мигрен гашта метавонад.
Ҳавои хушки утоқи хоб
Асбобҳои гуногуни барқие, ки мову шумо ба хотири гарм кардани утоқҳои худ дар айёми сардӣ истифода мебарем, ҳавои хонаро хушк месозанд. Ҳавои хушк боиси деградатсия мегардад, ки сабаби маъмултарини мигрен ва дарди сар мебошад.
Роҳҳои пешгирии мигрен
1. Бештар об нӯшед!
Тавре ки қайд кардем, деградатсия сабаби маъмултарини мигрен ва дарди сар аст. Аз сабаби хушкшавии ҳавои дар муҳити атроф буда ҷисм иинсон бештар обро талаф медиҳад, бинобар ин, кӯшиш кунед ҳар рӯз на камтар аз ду-се литр об нӯшед, то ки ҷисми шумо бо мушкили камобӣ дуҷор гашта, дарди саратон авҷ нагирад. Дар ин мавсим ҳамчунин нӯшидани ҷойҳои гиёҳӣ ва шарбатҳои мевагӣ муфид буда, дар нигоҳ доштани гидрататсия кӯмак мерасонанд.
2. Аз нӯрҳои офтоб баҳра баред
Маъмулан дар фаслҳои сарди сол одамон камтар ба кӯча мебароянд ва ба таври бояду шояд аз нурҳои офтоб баҳра намебардоранд. Ин метавонад боиси кам шудани сатҳи витамини D дар организм гардад, ки дар навбати худ ба сатҳи серотонин таъсир мерасонад ва мигренро ба вуҷуд меорад. Барои пешгирӣ кардани дарди сар нимаи дуюми рӯз вақти худро бештар берун аз бино гузаронидан лозим аст.
3. Аз асабоният ва стресс дурӣ биҷӯед!
Барои гирифторони мигрен асабонияти зиёд ва стресс як ангезаи бузург аст. Хоҳед, ки аз дарди ҷонкоҳи сар эмин монед, аз стресс ва асабоният дурӣ ҷуста, ба ҳар майда-чӯйда аҳамият надиҳед. Машғул шудан бо йога ва медитатсия барои пеши роҳи стрессро гирифтан кӯмак мерасонанд. Машқҳои махсуси нафаскашии чуқур низ асабониятро бартараф намуда метавонад. Фаъолияти ҷисмонӣ ҳам шиддати стрессро коҳиш медиҳад.
4. Ба ғизои худ диққати ҷиддӣ диҳед!
Қобили зикр аст, ки баъзе хӯрданиҳо аз қабили панир, гӯшти коркардшуда, шоколад ва машрубот боиси авҷ гирифтани мигрен гашта метавонанд. Аз ҳамин хотир барои пешгирии ин беморӣ ба ғизои худ диққати ҷиддӣ доджан лозим аст. Кӯшиш кунед, ки аз хӯрданиҳои зарранок парҳез намуда, бештар меваю сабзавот хӯред. Ғалладонагиҳои низ аз сафедаҳои бой буда, бисёр фоиданоканд. Дар айёми сармо бештар моҳӣ истеъмол кардан лозим аст, зеро моҳӣ дорои омега-3 мебошад, ки як ҷузъи муфид барои коҳиш додани мигрен ба шумор меравад.
5. Истеъмоли кофеинро маҳдуд намоед
Аксарият бар он назаранд, ки истеъмоли маҳсулоти аз кофеин бой метавонад дар пешгирии мигрен кӯмак расонад, вале он на ҳамеша ва на бар нафъи ҳама аст. Дар баъзе одамон кофиен баръакс, боиси авҷ гирифтани беморӣ мегардад, бинобар ин, кӯшиш кунед, ки маҳсулоти дорои кофеинро ба миқдори маҳдуд истеъмол намоед.
6. Машқҳои ҷисмониро фаромӯш накунед
Машқҳои ҷисмонӣ як воситаи пурқувват дар пешгирии мигрен мебошанд. Барои пешгирии ин беморӣ муттахассисон дар як ҳафта ҳадди аққал 150 дақиқа машқҳои мӯътадили аэробикӣ, аз қабили пиёда рафтан, велосипедронӣ ва ё шиновариро тавсия додаанд.
7. Аз бӯйҳои ғализ аллергия доред...
Агар шумо ба бӯй аллергия дошта бошед, кӯшиш кунед, ки аз он канорагирӣ намоед. Гап дар он аст, ки бӯйҳои гуногун, ки ба инсон хушоянд нестанд, системаи асабро ба шӯр меоранд ва ин боиси авҷ гирифтани сардарди мигренӣ мешавад.
8. Ба тарзи нишасти худ диққат диҳед
Аксари одамон ҳангоми кор дар паси миз ё шабакаҳои иҷтимоӣ ба тарзи нишасти худ тамоман диққат намедиҳанд. Дар натиҷа бар асари нодуруст нишастан мушшакҳо ба ташаннуҷ гирифтор гашта, ин боиси авҷгирии дарди сар мешавад. Барои пешгирии мигрен шуморо лозим аст, ки дар фазои кории худ дуруст ва бароҳат шинед. Дар ҳар ду-се соат ба худ каме танаффус эълон намоед, то ки бар асари асабонияти зиёд саратон ба дард наояд.
9. Иловаҳои ғизоиро истифода баред
Имрӯзҳо дар бозору мағозаҳои кишварамон иловаҳои ғизоӣ, ки барои пешгирии мигрен кӯмак раоснида метавонанд, хеле зиёданд. Авз ҷумла иловаҳои ғизоии аз магний бой метавонанд ҳамлаҳои мигренро коҳиш диҳанд. Коэнзим Q10 ва рибофлавин (витамини B2) низ ба саломатӣ фоида доранд. Аммо пеш аз истифодаи иловаҳои ғизоӣ бо табибони оилавӣ маслиҳат кардан лозим аст.
10. Ба назди духтур равед, агар...
Шахсоне, ки мигрен доранд ва дар фаслҳои тирамоҳу зимистон бештар аз дарди шадиди сар азият мекашанд, бояд ҳамеша зери назорати духтур қарор дошта бошанд. Агар новобаста ба риоя намудани тадбирҳои дар боло зикршуда дарди сар ҳамоно шуморо азият медода бошад, ҳатман ба табибон муроҷиат намоед. Духтур метавонад дору ё машқеро ба шумо тавсия диҳад, ки ба хусусиятҳои ҷисматон ва реҷаи ҳаррӯзаи шумо мувофиқ аст.
