Вакилони Маҷлиси намояндагон бо ворид намудани тағйирот ба Кодекси ҷиноятии Ҷумҳурии Тоҷикистон ҷазо барои машғул шудан ба сеҳру ҷоду ва фолбиниро пурзӯр карданд.
Минбаъд тибқи тағйирот ба моддаи 201-и Кодекси мазкур барои машғул шудан ба сеҳру ҷоду ва фолбинӣ, агар чунин кирдор дар давоми соли баъди татбиқи ҷазои маъмурӣ содир шуда бошад, ҷавобгарии ҷиноятӣ пешбинӣ гардид. Қаблан барои ин кирдор танҳо ҷазои маъмурӣ пешбинӣ шуда буд.
Ҳамчунин, вакилон ба банди 2-юми моддаи 482-и Кодекси ҳуқуқвайронкунии маъмурӣ тағйирот ворид карда, андозаи ҷаримаи маъмуриро зиёд карда, дар баробари ин, ҳабси маъмуриро низ ҳамчун ҷазои алтернативӣ илова намуданд. Пештар ин моддаи Кодекси ҳуқуқвайронкунии маъмурӣ ҷарима аз 60 то 100 нишондиҳандаро пешбинӣ карда буд.
