Номинатсияи “Фарҳанги суманакпазӣ” ба Феҳристи мероси фарҳанги ғайримоддии ЮНЕСКО ворид гардид. Дар ин бора Вазорати корҳои хориҷии Тоҷикистон иттилоъ дод.

Гуфта мешавад, ки ин қарор дар ҷаласаи 20-уми Кумитаи байниҳукуматии мероси фарҳанги ғайримоддии Созмони омӯзишӣ, илмӣ ва фарҳангии Созмони Милали Муттаҳид (ЮНЕСКО) дар шаҳри Деҳлии Нави Ҳиндустон қабул шудааст.

Ба иттилои ин ниҳод, бахши “Фарҳанги суманакпазӣ” аз ҷониби Комиссияи миллии Тоҷикистон дар мавриди корҳои ЮНЕСКО таҳия гардида, соли 2023 ба баррасии ин созмон пешниҳод шуда буд.