Пӯст танҳо қабати берунаи ҷисм нест, он нишондиҳандаи ҳолати умумии организм мебошад. Агар пӯст варам ё сурх шавад, сабаб аксаран дар ғизо аст. Духтур-дерматолог Дмитрий Эллинский шарҳ дод, ки чӣ гуна бояд ғизо хӯрд, то пӯст солиму тоза бимонад.

Маҳсулоти муфид барои пӯст

Моҳиҳои равғандор (лосось, скумбрия, сардина) - дорои кислотаҳои равғании Омега-3 буда, варами пӯстро кам мекунанд ва пӯстро ором месозанд. Моҳиро 2–3 маротиба давоми ҳафта хӯрдан хуб аст.

Чормағз ва донагӣ (чормағзи англисӣ, тухми зағир, чиа) - манбаи витамини E ва руҳ мебошанд, ки пӯстро аз хушкӣ ва илтиҳоб муҳофизат мекунанд. Як мушт чормағз ё донагӣ дар як рӯз басанда аст.

Буттамеваҳо (черника, малина, клюква) - антиоксидантҳои онҳо пиршавии пӯстро ба таъхир мегузоранд. Буттамеваро метавон ба йогурти бенамак илова кард.

Сабзавоти баргдор (испаноқ, карами кейл, кресс-салат) - дорои витамини K ва фолат буда, ба таҷдиди пӯст ва кам шудани сурхӣ мусоидат мекунанд.

Зардчӯба- моддаи фаъоли он хусусияти зиддиилтиҳобӣ дорад. Метавон ба таомҳо ё шир илова кард (шир бо ним қошуқча зардчӯба, каме имбир ва дорчин). Аммо зардчӯбаро зиёд истеъмол кардан манъ аст, зеро метавонад барои организм зарар дошта бошад.

Ситрусиҳо (апелсин, лимӯ, грейпфрут) - сарчашмаи витамини C, ки коллагенро таҳким мебахшад ва пӯстро ҷавон нигоҳ медорад.

Чойи кабуд - катехинҳои он бо илтиҳоб ва пиршавии бармаҳал мубориза мебаранд. Давоми рӯз 2–3 пиёла нӯшидани чойи кабуд тавсия дода мешавад.

Аз чӣ бояд парҳез кард

Духтур тавсия медиҳад, ки истеъмоли зиёди кофеинро маҳдуд созед, он сатҳи гормони стресс (кортизол)-ро боло мебарад ва илтиҳобро зиёд мекунад. 1 пиёла қаҳва давоми рӯз кофист. Шакар ва пухтупаз аз орди сафедро кам кунед, зеро онҳо боиси болоравии тези қанд ва варами пӯст мешаванд. Ба ҷойи он:

• нони донагӣ,

• биринҷи қаҳвагӣ,

• макарони аз гандуми сахт ва кампухта бихӯред.

Илова бар ин, аз гӯшти бирён ё маҳсулоти коркардшуда (сосиска, колбаса, хӯроки нимтайёр) худдорӣ намоед, онҳо равғанҳои зараровар доранд.

Ташхис кунед

Ғизои дуруст танҳо як қисми табобати пӯст аст. Агар илтиҳоб ё доғҳо давомнок бошанд, ҳатман ба дерматолог муроҷиат кунед. Дар ҳолатҳои шадид, табобати доругӣ ва таҳқиқоти махсус заруранд:

• тестҳои генетикӣ (барои таҳаммулнопазирии лактоза, фруктоза ё глютен),

• тестҳои нафаскашӣ,

• таҳлилҳои ферментативӣ,

• санҷиши аллергия ба ғизо,

• парҳезҳои санҷишӣ бо хориҷсозии маҳсулоти эҳтимолан зарарнок.

Духтур таъкид мекунад: нигоҳубини пӯст аз табақи шумо оғоз меёбад, ғизои солим, оромӣ ва назорати дуруст метавонанд пӯсти шуморо зебо ва солим нигоҳ доранд.