Субҳи 9-уми октябр дар коргоҳи рангубори мебел дар шаҳри Душанбе сӯхтор ба амал омад. Ин ҳодиса дар ҶДММ «Сайидон Ғайрат», воқеъ дар кӯчаи Карин Манн 130, ноҳияи Фирдавсӣ рух додааст.

Ба иттилои Хадамоти оташнишонӣ, дар бораи ҳодиса тақрибан соати 08:26 хабар расида, кормандони хадамот тавонистаанд оташро то соати 09:11 пурра хомӯш кунанд. Ба гуфтаи манбаъ, дар натиҷаи сӯхтор коргоҳҳои дигари ҳамсоя осеб надидаанд.

Мақомот айни замон сабабҳои сар задани сӯхтор, масоҳати оташсӯзӣ ва ҳаҷми зарари расидаро муайян мекунанд.

Ин дуюмин ҳодисаи сӯхтор дар коргоҳи «Сайидон Ғайрат» дар давоми як ҳафта мебошад. Сӯхтори аввал рӯзи 4-уми октябр рух дода, навори он дар шабакаҳои иҷтимоӣ паҳн шуда буд. Мақомот он замон ҳодисаро шарҳ надода, аммо тасдиқ карда буданд, ки оташ дар қисмати дигари корхона сар задааст.

Дар наворҳои нашршуда алангаи оташ ва дуди ғализе, ки аз бино баланд мешуд, ба назар мерасид.

То кунун маълумоти расмӣ дар бораи сабабҳои ҳар ду сӯхтор ва ҳаҷми зарари эҳтимолии онҳо пешниҳод нашудааст.