Вазир гуфт: Бо мардум хушмуомила бошед!

Вазири корҳои дохилии Тоҷикистон Рамазон Раҳимзода зимни мулоқот бо милитсионерони ҷавоне, ки ба тозагӣ ба кор оғоз намудаанд, талаб кардааст, ки бо мардум хушмуомила бошанд.
Мулоқоти Рамазон Раҳимзода бо хатмкунандагони Академияи Вазорати корҳои дохилӣ, Коллеҷи милитсия ва Коллеҷи оташнишонӣ рӯзи 5-уми август сурат гирифта, вазир онҳоро ба вазифаҳои хидматӣ таъин кардааст.
Зимни ин дидор Раҳимзода ба кормандони ҷавони милитсия таъкид кардааст, ки ҳуқуқу манфиатҳои шаҳрвандонро эҳтиром намуда, бо мардум хушмуомила бошанд ва вазифаҳои хидматии худро бо ҳисси баланди масъулиятшиносӣ, содиқона иҷро кунанд.