Барои саёҳати меҳмонони Конфронси сеюми байналмилалии сатҳи баланд оид ба Даҳсолаи байналмилалии амал «Об барои рушди устувор, солҳои 2018-2028» 7 хатсайр ташкил карда шудааст.

Кумитаи рушди сайёҳии назди Ҳукумати Ҷумҳурии Тоҷикистон ҳамчун иштирокчии ин конфронси бонуфузи сатҳи ҷаҳонӣ баҳри муаррифии зарфияти сайёҳии мамлакат барои меҳмонони конфронс 7 хатсайри беҳтарин омода намудааст.

Бино ба иттилои Кумита, дар доираи ин чорабинӣ меҳмонон метавонанд бо якчанд мавзеи зебою хотирмони мамлакат аз рӯи хатсайрҳои зерин шинос шаванд:

- Саёҳат дар шаҳри Душанбе.

- Сафар ва тамошои Қалъаи Ҳисор.

- Саёҳат ба шаҳри Норак (шиносоӣ бо сарбанди Неругоҳи барқи обии «Норак»).

- Саёҳат ба шаҳри Роғун (шиносоӣ бо Неругоҳи барқи обии «Роғун»).

- Саёҳат ба дараи зебоманзараи Ромит.

- Сайругашт дар дараи Варзоб ва қад-қади болооби дарёи Сиёма.

- Саёҳат ба Маҷмааи лижаронии Сафеддара.

- Дар ин сафарҳо меҳмононро намояндагони Кумитаи рушди сайёҳӣ, ширкатҳои сайёҳӣ ва роҳбаладон ҳамроҳӣ менамоянд,- меафзояд манбаъ.