Аз 1-уми июли соли 2025 равзанаи расмии гузариши тобистона дар мусобиқаи Лигаи олии футболи Тоҷикистон оғоз гардид ва то 28-уми июл идома хоҳад ёфт.
Бино ба иттилои ТВ “Варзиш”, дар ин фосила тамоми бошгоҳҳои лигаи олӣ ҳақ доранд, ки бозигарони навро ба ҳайати худ ҷалб намуда, онҳоро расман ба қайд гиранд.
Тибқи муқаррароти Федератсияи футболи Тоҷикистон ва дастурамали Лигаи футболи кишвар, дар ин равзана дастаҳо метавонанд ҳам футболбозони дохилӣ ва ҳам легионерон (бозигарони хориҷӣ)-ро ба ҳайат шомил созанд, ба шарте ки шартнома бо онҳо дар доираи қонун ва қоидаҳои FIFA ба имзо расад.
Маврид ба зикр аст, ки равзанаи тобистона яке аз муҳимтарин фурсатҳо барои бошгоҳҳост, то дар остонаи мавсими дуюми чемпионат ҳайаташонро тақвият бахшанд. Хусусан дастаҳое, ки барои мақомҳои боло мубориза мебаранд ё мехоҳанд аз минтақаи хатар наҷот ёбанд, кӯшиш мекунанд бо ҷалби бозигарони пуртаҷриба ва ё наврасони умедбахш сатҳи бозии худро боло баранд.
Барои сабти футболбоз дар ҳайати нави даста, шартнома бояд дар низоми электронӣ ба қайд гирифта шавад ва ба тасвиби ниҳоди масъул - Лигаи футболи Тоҷикистон расад. Баъди ин, футболбоз метавонад дар бозиҳои расмии чемпионат ширкат намояд.
