Салом хонандаҳои азиз. Ман Манон, ду сол боз дар мулки рус муҳоҷир ҳастам. Бо дипломи олӣ дар сохтмон семент мешӯрам.
Аҳволи муҳоҷирон дар Русия ба ҳама маълум, гоҳ кор меёбем, гоҳ не. Занам ҳар рӯз занг зада доду вой мекунад, ки агар хона нахарӣ, ман аз хона баромад меравам, чунки рӯзидароз хизмати падару модар ва хоҳару додаронитуро кардан ба дилам задааст.
Мефаҳмонам, ки хона харидан кори осон нест, камтар тоқат кун, ҳамин, ки пули кироӣ ҷамъ кардам, мехарем, вале занам худашро ба девонагӣ зада дод мегӯяд, ки мард нашуда мур, ҳунари хона харидан, ки надоштӣ, барои чӣ зан гирифтӣ.
Ду пояшро дар як мӯза андохта истодааст, ки агар хона нахарӣ, талоқамро деҳ. Рӯзҳои охир телефонашро намебардорам, чунки доду фиғони занам ҷонамро ба нӯги биниам овардааст.
Ман дар оила як писар ҳастам, чӣ хел падару модарамро партофта равам?
Дар байни обу оташ монда, чӣ кор карданамро намедонам. Падару модарамро монда равам, айб аст, ҷавоби занамро диҳам, се фарзандам ятим мешаванд. Илтимос, ба мани роҳгумзада маслиҳат диҳед, чӣ кор кунам?
Манон, муҳоҷир аз шаҳри Маскав
