Рустам Ятимов-гаронбаҳотарин
дарвозабон дар Осиёи Марказӣ
Дарвозабони овозадори тоҷик Рустам Ятимов дар раддабандии нави гаронбаҳотарин футболбозони Осиё, ки Transfermarkt нашр намуд, дар зинаи 6 қарор гирифта, гаронтарин дарвозабон дар Осиёи Марказӣ эълон шудааст. Арзиши Ятимов 1,80 млн евро арзёбӣ мешавад.
Зинаи аввалро дар ин раддабандӣ дарвозабони 23-солаи тими “Парма”-и Италия Дзайон Судзукии ҷопонӣ ишғол намудааст, ки арзишаш 20 млн евро мебошад.
Дар зинаи дуюм дарвозабони "Сент-Трюйден" Лео Кокубои 25-сола аз Ҷопон бо арзиши 4 млн евро қарор дорад.
Зинаи сеюмро дарвозабони дастаи "Ванкувер Уайткэпс" Ёхэй Такаокаи 29-сола бо арзиши 3,50 млн евро ишғол кардааст.
Зинаи чорумро бошад, дарвозабони 29-солаи дастаи "Кремонезе" –Италия Эмил Аудеро бо арзиши 3,20 млн евро соҳиб шуд.
Дар зинаи панҷум дарвозабони дастаи "Санфречче Ҳиросима" Кэйсукэ Осакои 26 сола ва дарвозабони 33-солаи "Леванте" Мэттю Райани австралиягӣ қарор доранд, ки нархи ҳар кадом 2 млн евро будааст.
Зинаи шашумро Рустам Ятимов, дарвозабони 27-солаи тоҷик, ки дар дастаи "Ростов"-и Русия бозӣ мекунад, бо арзиши 1,80 млн евро ишғол намудааст. Ятимов дар байни дарвозабонҳои Осиёи Марказӣ аз ҳама гаронбаҳотарин дарвозабон ба шумор меравад.
