Овозхони ӯзбек Ҳамдам Собиров солҳои охир ба яке аз чеҳраҳои шинохтаи мусиқии ӯзбек табдил ёфтааст. Таронаҳои ӯ на танҳо дар Ӯзбекистон, балки дар Тоҷикистон ва дигар кишварҳои Осиёи Марказӣ низ шунавандагони зиёд доранд. Барои бисёре аз мухлисони тоҷик номи ӯ пеш аз ҳама бо таронаи «Malohat» пайванд дорад.
Ҳамдам Собиров 6-уми январи соли 1989 дар вилояти Навоии Ӯзбекистон ба дунё омадааст. Ӯ аз овони кӯдакӣ ба мусиқӣ шавқ дошта, орзуи сароянда шуданро мекард. Пас аз хатми мактаб дар ҷодаи фарҳанг ва санъат таҳсил кардааст.
Роҳи расидан ба саҳна барои ӯ чандон осон набудааст. Бо сабаби мушкилоти молиявии оила Ҳамдам дар ҷавонӣ ба Русия рафта, дар сохтмон кор кардааст. Пас аз бозгашт ба Ӯзбекистон таҳсилашро идома дода, ба Донишкадаи давлатии фарҳанг ва санъати Ӯзбекистон дохил шудааст.
Аз гурӯҳи «Mango» то фаъолияти мустақил
Ҳангоми таҳсил Ҳамдам бо ҳамкурсони худ Азизхон Саидумаров ва Фаррух Раимов гурӯҳи мусиқии «Mango»-ро таъсис додааст. Гурӯҳ миёни ҷавонони ӯзбек маъруфият пайдо кард, аммо баъдан Ҳамдам роҳи мустақили худро интихоб намуд.
Таронаҳои «Maktabimda», «Holimga qara» ва «Yaxshi qol» ба ӯ шуҳрати бештар оварданд. Аммо яке аз корҳои маъруфтарини ӯ таронаи «Malohat» ба ҳисоб меравад, ки дар YouTube садҳо миллион боздид гирифтааст.
Тибқи маълумоти Daryo, то моҳи январи соли 2026 клипи «Malohat» аз 322 миллион боздид гузашта буд. Ҳамчунин, моҳи августи соли 2025 шумораи умумии тамошои клипҳои Ҳамдам Собиров дар YouTube аз 5 миллиард гузаштааст.
«Janze» - боз як таронаи сертамошобин
Дар байни корҳои нави овозхон таронаи «Janze» низ таваҷҷуҳи зиёди шунавандагонро ба худ ҷалб кардааст. Клипи ин тарона дар YouTube беш аз 160 миллион боздид гирифтааст.
Мазмуни тарона атрофи муҳаббат, зебоии маҳбуба, рашк ва интизории ҷавоб аз шахси дӯстдошта мегардад. Маҳз чунин мавзуи ошно барои ҷавонон ва оҳанги хотирмон ба маъруфияти тарона мусоидат кардааст.
160 миллион боздид танҳо як рақам нест. Ин нишон медиҳад, ки мусиқии Ҳамдам Собиров берун аз доираи шунавандагони ӯзбекзабон низ паҳн шудааст. Дар Тоҷикистон низ таронаҳои ӯ, бахусус «Malohat» ва «Janze» миёни як қисми ҷавонон маъруфияти зиёд доранд.
Аз саҳна то миллионҳо боздид
Ҳамдам Собиров имрӯз на танҳо ҳамчун сароянда, балки ҳамчун оҳангсоз ва муаллифи мусиқӣ низ фаъолият мекунад. Ӯ барои дигар ҳунармандон низ асарҳои мусиқӣ эҷод кардааст.
Соли 2024 ӯ соҳиби чанд ҷоизаи мусиқӣ, аз ҷумла унвони «Беҳтарин сарояндаи мард» шудааст.
Ҳамдам Собиров оиладор буда, соҳиби ду фарзанд - писар ва духтар мебошад.
Қиссаи фаъолияти ӯ аз як ҷиҳат ҷолиб аст: ҷавоне, ки як замон барои таъмини зиндагӣ дар Русия дар сохтмон кор мекард, имрӯз бо сурудҳои худ ба миллиардҳо боздид дар YouTube расидааст. Ва «Janze» бо беш аз 160 миллион боздид нишон медиҳад, ки маъруфияти ӯ ҳанӯз идома дорад.
Камолиддин ҲАННОНӢ
