Салом, хонандагони азиз! Ман ҷавони 28-сола ҳастам ва дар оила фарзанди ягона - писари ягонаи падару модарам мебошам. Чанд сол боз орзуи оила барпо кардан дорам, вале ҳар қадар хостгорӣ равем, ба мақсад намерасем.
Дар деҳаамон духтарони зиёде ҳастанд. Ба хонаи чандин оила рафта, бо нияти нек хостгорӣ кардем. Модарам дастурхон орост, бо эҳтиром ба хонаи духтарон рафтем, аммо қариб ҳамеша як ҷавоб мешунавем: «Духтарамон ҳоло шавҳар намекунад» ё «Мо ба яккаписар духтар намедиҳем».
Баъдтар аз чанд духтар сабаби рад кардани хостгориро пурсидам. Онҳо ошкоро гуфтанд, ки метарсанд баъди келин шудан дар хонаи мо бо модарам мушкил пайдо кунанд. Ба назари онҳо, чун ман фарзанди ягона ҳастам, модарам нисбат ба келин ҳассосият нишон медиҳад ва зиндагии ӯро душвор мекунад.
Аммо ман чунин фикрро нодуруст медонам. Модари ман худ ҳамеша мегӯяд, ки келинро мисли духтараш қабул мекунад. Ӯ мехоҳад, ки ман оиладор шавам ва зиндагии мустақилона дошта бошам. Ман ҳам бовар дорам, ки зиндагии зану шавҳар бояд бар муҳаббат, эҳтиром ва ҳамдигарфаҳмӣ бунёд шавад. Агар байни келин ва хушдоман мушкил пеш ояд, онро бо суҳбат ҳал кардан мумкин аст.
То имрӯз мо тақрибан ба панҷоҳ хонаи духтарон хостгорӣ рафтаем, вале ҳеҷ кадоме маро ба домодӣ қабул накард. Ростӣ, ин ҳолат маро рӯҳафтода кардааст. Баъзан ба худ савол медиҳам: оё воқеан яккаписар будан нуқсон аст? Магар фарзанди ягона будан маънои онро дорад, ки ман наметавонам шавҳари хуб бошам?
Ман мехоҳам бо духтаре оила барпо кунам, ки маро бо хислату рафторам бишиносад, на танҳо аз рӯйи он ки дар оилаи мо чанд писар ҳаст. Оиладорӣ бояд интихоби ду ҷавон бошад, на тарси пешакӣ аз мушкилоте, ки шояд ҳеҷ гоҳ ба миён наояд.
Аз хонандагон, махсусан ҷавонон ва калонсолони таҷрибадор маслиҳат мехоҳам: чӣ гуна метавонам ин мушкилро ҳал кунам? Оё воқеан духтарон аз ҳамсари яккаписар шудан метарсанд? Ё сабаби дигаре ҳаст, ки ман онро намедонам?
Бо эҳтиром, БАХТОВАР
