Шуъбаи маорифи ноҳияи Дӯстӣ бо нашри як эълон дар шабакаҳои иҷтимоӣ хабар додааст, ки омӯзгорони хоҳишманди кор дар муассисаҳои таълимӣ бо замин барои хона таъмин мешаванд.

Дар матни эълон гуфта шудааст, ки ин ташаббус дар самти пурра бартараф кардани норасоии омӯзгорон мусоидат хоҳад кард.

"Замин ба омӯзгорон аз фанҳои забони русӣ, англисӣ, химия, физика, математика ва технологияи иттилоотӣ баъди ба кор омадан дода мешавад. Ҳоло чанд омӯзгор дар муассисаҳои таълимии ҷамоати деҳоти 20-солагии Истиқлоли ноҳияи Дӯстӣ намерасад",-омадааст дар матни эълон.

Ҳамчунин, гуфта шудааст, ки барои бартараф кардани ин мушкилӣ ва ҳам дастгирии омӯзгорони ҷавон роҳбарияти ноҳия тасмим гирифтанд, ки омӯзгорони ба кор омадаро бо замини наздиҳавлигӣ таъмин кунанд.