Падар ва ҳамзамон намояндаи ҳамлагари “Манчестер Сити” Эрлинг Ҳоланд - Алфи Ҳоланд ва агенти футболбоз Рафаэла Пимента ба овозаҳо дар бораи эҳтимоли гузариши ситораи норвегӣ ба “Реал Мадрид” посух додаанд.

Бино ба иттилои ТВ “Варзиш”, пештар яке аз номзадҳо ба мақоми президенти “Реал Мадрид” Энрике Рикелме изҳор карда буд, ки дар сурати пирӯз шуданаш дар интихобот Эрлинг Ҳоландро ба ҳайати даста ҷалб мекунад. Аммо намояндагони ҳамлагар ин хабарҳоро беасос арзёбӣ кардаанд. Дар суҳбат бо рӯзноманигор Фабритсио Романо онҳо гуфтаанд: “Ҳамаи ин хеле ҷолиб аст, аммо ба ҳақиқат мувофиқат намекунад. Мо ба ҳар ду номзад дар интихоботи президенти “Реал Мадрид” барори кор мехоҳем”.

Ин изҳорот нишон медиҳад, ки дар айни ҳол байни Ҳоланд ва “Реал Мадрид” ягон музокироти расмӣ ё нақшаи гузариш вуҷуд надорад.

Эрлинг Ҳоланд яке аз беҳтарин ҳамлагарони ҷаҳон ба шумор рафта, дар ҳайати “Манчестер Сити” нақши калидӣ мебозад. Футболбози норвегӣ дар чанд мавсими охир бо голҳои сершумор ва бозии дурахшони худ таваҷҷуҳи бисёр бошгоҳҳои бузурги Аврупоро ба худ ҷалб кардааст.

Бо вуҷуди ин, намояндагони бозигар таъкид кардаанд, ки овозаҳои ахир дар бораи пайвастани ӯ ба “Реал Мадрид” асоси воқеӣ надоранд ва танҳо бахше аз мубоҳисаҳои марбут ба интихоботи президентии бошгоҳи шоҳона мебошанд.