Arzon march 2024
Почтаи электронӣ тоҷикӣ шуд
1530

Аз ҷониби Маркази таҳлилӣ-иттилоотии назди Сарраёсати маорифи шаҳри Душанбе низоми миллии почтаи электронӣ бо забони тоҷикӣ амалӣ гардид. Дар ин бора Шодӣ Муродов, корманди Маркази мазкур ба Oila.tj хабар дод.

Ӯ гуфт, ба омодасозии почта барномасозони Маркази таҳлилӣ-итилоотӣ ҷалб гардида, онро дар заминаи барномаи «Roundcube» таҳия намуданд. Почта дар марҳилаи аввал дар сохтори Сарраёсати маорифи шаҳри Душанбе ва шуъбаҳои маорифи ноҳияҳои пойтахт ҷорӣ шуд.

Почта бо мақсади таъмини амнияти иттилоотӣ, беҳтар намудани суръати мубодилаи иттилоот, арҷгузорӣ ба забони давлатӣ, осон, дастрас ва бехатар намудани истифодаи системаи почтаи электронӣ, инчунин сода намудани раванди гардиши ҳуҷҷатҳо таҳия гардид.

"Дар қаламрави мамлакат бори нахуст ба муассисаҳои соҳаи маорифи пойтахт муяссар гардид, ки аз истифодаи ҳамаи почтаҳои электронии хориҷӣ (доменҳои ru, com ва ғайра) даст кашида, ҳама намуди иттилоотро дар доираи домени миллӣ (tj) мубодила намоянд", - гуфт Муродов.

Бояд гуфт, ки таҳияи низоми миллии почтаи электронӣ қадами муҳим дар самти рушди рақамикунонии низоми табодули иттилоот буда, пешниҳоди чунин низом кори муассисаҳои давлатиро дар самти таҳия ва интиқоли ҳуҷҷатҳои расмӣ ва табодули шаклҳои гуногуни иттилоот ба маротиб осон, ҳамзамон бехатар мегардонад.

Як ҷиҳати муҳимми дигари почта дар он аст, ки низоми он бо забони тоҷикӣ таҳия гардида, ба корбарон имкон медиҳад, ки дар мубодилаи парвандаҳои худ ба мушкилӣ дучор нашаванд.

Тавре ки муовини директори Маркази таҳлилӣ-иттилоотии назди Сарраёсати маорифи шаҳри Душанбе Санҷар Абунасрпур зимни суҳбат бо Oila.tj иброз дошт, низоми миллии почтаи электронӣ дар асоси Қарори Ҳукумати Ҷумҳурии Тоҷикистон аз 30  декабри соли 2011 «Дар бораи Консепсияи ташаккули ҳукумати электронӣ дар Ҷумҳурии Тоҷикистон» ва «Барномаи рушди забони давлатӣ барои солҳои 2020-2030» аз 28 ноябри соли 2020 бо мақсади ташаккули  низоми ягонаи  табодули  иттилоотӣ бо истифода аз захираҳои иттилоотии электронӣ ва пайвастшавии  доимӣ  ба  система ва шабакаҳои маҳдуди баҳисобгирии алоқаи ҳамаи корбарон ва боло бурдани нақшу мақоми забони тоҷикӣ таҳия гардидааст. Он аввалин низоми миллии почтаи электронӣ дар ҷумҳурӣ маҳсуб шуда, татбиқи фарогири он дар марҳилаҳои баъдӣ дар назар аст.

Аз идора: Почтаи электронии миллӣ дар пайванди зерин қарор дорад.

Поделиться новостью
Шарҳ
(0)
ҲАНУЗ ШАРҲ НЕСТ
НОМАТОНРО НАВИСЕД
ШАРҲАТОНРО ГУЗОРЕД
Шарҳ
(0)
ҲАНУЗ ШАРҲ НЕСТ
НОМАТОНРО НАВИСЕД
ШАРҲАТОНРО ГУЗОРЕД