Дар пайи садамаи нақлиётӣ дар шоҳроҳи Душанбе - Турсунзода се нафар - як модари 29-сола ва ду фарзандаш ба ҳалокат расидаанд.
Тибқи иттилои Вазорати корҳои дохилии Тоҷикистон, садама рӯзи 5-уми октябр дар ҳудуди деҳаи Ғуриёти шаҳри Ҳисор рух додааст. Гуфта мешавад, ки ронандаи 39-солаи автомашинаи «Kia K5», сокини Ҳисор ҳангоми ҳаракат занеро ҳамроҳи ду фарзандаш, ки аз гузаргоҳи пиёдагард мегузаштанд, пахш кардааст. Дар натиҷа, Шукрона Табароваи 29-сола, инчунин фарзандонаш Абдураҳмони 7-сола ва Ойшаи 1-сола, сокинони шаҳри Душанбе ҷони худро аз даст додаанд.
Мақомот мегӯянд, ки таҳқиқи сабабу ҳолатҳои садама идома дорад. Дар бораи мавқеи ронанда ва наздикони ҳалокшудагон то ҳол иттилои бештар нашр нашудааст.
