Агентии Туркия оид ба ҳамкорӣ ва ҳамоҳангсозӣ (ТИКА) фаъолияти худро ҷиҳати дастгирии иштироки фаъолонаи занон дар ҳаёти иҷтимоӣ ва иқтисодӣ дар Тоҷикистон идома медиҳад. Дар ин замина, дар ҳамкорӣ бо Ташкилоти ҷамъиятии «Моҳрӯ» барои занони деҳаи Шарораи шаҳри Ҳисор барномаи омӯзиши дӯзандагӣ амалӣ гардид.

Барномаи мазкур бо иштироки беш аз 10 зани ҷавон сурат гирифта, ҳадаф аз он баланд бардоштани малакаҳои касбӣ, ҷалби фаъолона ба раванди истеҳсолот ва таҳкими мавқеи онҳо дар ҳаёти иқтисодӣ мебошад.

Дар доираи ин барнома, ки аз ҷониби ТИКА бо мошинаҳои муосири дӯзандагӣ ва таҷҳизоти зарурӣ таъмин карда шудааст, ба иштирокчиён дар давоми шаш моҳ таҳти роҳбарии омӯзгорони ботаҷриба дарсҳои амалӣ оид ба дӯзандагӣ, тарҳрезӣ, буриш ва ороиш дода шуданд.

Ҳадафи лоиҳа мусоидат ба он аст, ки занон ба шахсони мустақил табдил ёфта, ба иқтисоди оилавии худ саҳм гузоранд. Дар натиҷаи ин барномаи омӯзишӣ, иштирокчиён ба сатҳи мустақилона истеҳсол намудани маҳсулот расида, имкони ба даст овардани даромади устуворро пайдо карданд.

Масъулони Ташкилоти ҷамъиятии «Моҳрӯ» изҳор доштанд, ки шогирдон дар оғоз таҷрибаи маҳдуди дӯзандагӣ доштанд, вале дар давоми омӯзиш ба пешравиҳои назаррас ноил шуда, дар соҳаҳои дӯхтани либосҳои миллӣ, шим ва либосҳои махсуси корӣ маҳорат пайдо карданд.

Бо мақсади дастгирии онҳо дар роҳандозии тиҷорати шахсӣ, аз ҷониби ТИКА ба ҳамаи хатмкунандагон таҷҳизоти зарурӣ, пеш аз ҳама мошинаҳои дӯзандагӣ ва дарзмолҳо барои истеҳсоли маҳсулот дар хона тақдим карда шуд.

ТИКА аз соли 1995 инҷониб дар Тоҷикистон дар соҳаҳои маориф, тандурустӣ, кишоварзӣ ва рушди захираҳои инсонӣ татбиқи лоиҳаву фаъолиятҳои мухталифро идома дода истодааст.