Як гурӯҳ табибон аз шаҳри Мюнхени Ҷумҳурии Федералии Олмон ба Душанбе омада, дар беморхонаи “Шифобахш” маризони гирифтори иллатҳои чашмро муоина ва ҷарроҳӣ мекунанд. Дар ин бора Вазорати тандурустӣ ва ҳифзи иҷтимоии аҳолӣ хабар додааст.

“Ҳадаф аз ташрифи мутахассисони олмонӣ ба Тоҷикистон - ин табодули таҷриба бо табибони тоҷик, гузаронидани як қатор амалиётҳои ҷарроҳии бемориҳои чашм ба шумор меравад”,-иттилоъ додааст манбаъ.

Дар доираи сафари кориашон ба Тоҷикистон табибони олмонӣ дар Муассисаи давлатии «Маркази миллии тиббии “Шифобахш” аллакай ташхису муоина ва чанд амалиёти ҷарроҳии бемориҳои чашмро анҷом додаанд.

Дар доираи ин иқдом дар муассисаи номбурда 30 нафар беморони чашм аз ҷониби мутахассисони олмонӣ ҷарроҳӣ карда мешаванд. Маризоне, ки мехоҳанд аз муоинаи табибони олмонӣ гузаранд, метавонанд ба бинои 2-и Маркази миллии тиббии “Шифобахш” муроҷиат намоянд.