Вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода аз биноҳои Хадамоти назорати давлатии санитарию эпидемиологии Вазорати тандурустӣ ва ҳифзи иҷтимоии аҳолӣ ва Маркази назорати давлатии санитарию эпидемиологии шаҳри Душанбе пас аз таъмиру тармим дидан ба амал овард.
Бино ба иттилои дафтари матбуоти Вазорати тандурустӣ ва ҳифзи иҷтимоии аҳолии кишвар, хадамот ва маркази мазкур бо мақсади боз ҳам беҳтар намудани фаъолияти корӣ ва фароҳам овардани шароиту имкониятҳои мусоиди корӣ барои кормандон аз таъмиру тармим бароварда шуда, мавриди истифода қарор гирифтаанд. Дар ин муассисаҳои санитарию эпидемиологӣ тамоми шароиту имкониятҳои зарурӣ барои пеш бурдани фаъолияти корӣ, аз ҷумла гузаронидани таҳлилҳои лабараторӣ муҳайё карда шудааст.
Дар ҷараёни боздиди хеш Ҷамолиддин Абдуллозода бо рафти фаъолияти Хадамоти назорати давлатии санитарию эпидемиологии вазорат ва Маркази назорати давлатии санитарию эпидемиологии шаҳри Душанбе шинос гашта, ба масъулин ҷиҳати боз ҳам беҳтар намудани фаъолияти корӣ дастуру супоришҳои мушаххас додааст.
